ព័ត៌មាន​​តាម​​​ អ៊ីម៉ែល

បើ​​លោក​​អ្នក​​ចង់​​ទទួល​​បាន​​នូវ​​ព័ត៌​មាន​​ថ្មី​​ៗ​​ប្រចាំ​​សប្តាហ៍​ សូម​​បញ្ចូល​​អ៊ីមែល​​របស់​​លោក​​អ្នក

ចូលរួមស្ទង់មតិ

តើ​លោក​អ្នក​ចាប់​អារម្មណ៍​ព័ត៌​មាន​ទាំង​នេះ​កម្រិត​ណា?​
 

ឧបត្ថម្ភដោយ

funded.jpg

តាមរយៈ

គ្រប់គ្រងបច្ចេកទេសដោយ

ទិវា​អន្តរជាតិ​ប្រឆាំង​នឹង​អំពើ​ពុករលួយ​៩​ធ្នូ​ ​២០០៨​ PDF Print E-mail
Monday, 24 August 2009 , សរសេរដោយ​ « មជ្ឈមណ្ឌល​អភិវឌ្ឍន៍​សង្គម »   

ទិវា​អន្តរជាតិ​ប្រឆាំង​​អំពើ​ពុករលួយ​ ​ថ្ងៃ​ទី​០៩​ ​ធ្នូ​ ​ឆ្នាំ​២០០៨​ ​នៅ​ឆ្នាំ​​នេះ​មាន​អង្គការ​សង្គម​ស៊ីវិល​ជា​ច្រើន​បាន​ប្រារព្ធ​ទិវា​នេះ​ស្រប​ពេល​តែ​មួយ​នៅ​ចំនួន​៦​​ខេត្ត-​ក្រុង​ធំៗ​រួម​មាន៖​ ​ខេត្ត​បាត់ដំបង​ ​សៀមរាប​ ​ស្វាយរៀង​ ​ក្រចេះ​ ​ក្រុង​ព្រះសីហនុ​ ​និង​រាជធានី​ភ្នំពេញ។​ ​ដោយ​ឡែក​មជ្ឈមណ្ឌល​អភិវឌ្ឍន៍​សង្គម​ (ម.​អ.​ស)​ ​រួម​សហការ​ជាមួយ​អង្គការ​ផេក​កម្ពុជា​ ​(Pact-Cambodia)​ ​និង​អង្គការ​ខ្មែរ​ជិវិត​ថ្មី​ ​(INLC)​ ​​សមាគម​ទ្រទ្រង់​សុខមាលភាព​គ្រួសារ​ជនបទ​ ​(KWFA)​ ​​សមាគម​ក្តី​សង្ឃឹម​ដើម្បី​អភិវឌ្ឍន៍​ ​(HAD)​ ​បាន​រៀបចំ​ប្រារព្ធ​ទិវា​អន្តរជាតិ​ប្រឆាំង​អំពើ​ពុករលួយ​ ​នៅ​ទីលាន​បាល់​ទាត់​ ​ទីរួម​ខេត្ត​បាត់ដំបង​ ​ក្រោម​ការ​ឧបត្ថម្ភ​ថវិកា​ដោយ​ជំនួយ​ពលរដ្ឋ​អាមេរិក​ ​(USAID)​ ​តាម​រយៈ​អង្គការ​ផេក​កម្ពុជា​ និង​អុកស្វាម​ ​អង់គ្លេស​ ​(Oxfam GB)​ ​និង​តាម​រយៈ​មជ្ឈមណ្ឌល​អភិវឌ្ឍន៍​សង្គម។​ ​សមាជិក​សមាជិកា​ដែល​បាន​អញ្ជើញ​ចូលរួម​មាន​ជាង​៣០០​នាក់​រួម​មាន៖​ ​មន្ត្រី​រាជការ​ ​ក្រុម​ប្រឹក្សា​ឃុំ​ ​អាជីវករ​ ​គ្រូ​បង្រៀន​ ​សិស្ស​​ ​និសិ្សត​ ​អ្នកសារ​ព័ត៌មាន​ ​អង្គការ​សង្គម​ស៊ីវិល​ ​និង​ប្រជាពលរដ្ឋ​ក្នុង​ខេត្ត​បាត់ដំបង។​

ការ​ប្រារព្ធ​ទិវា​ ​ខាង​លើ​ ​គឺ​សម​ស្រប​ ​នឹង​ការ​ខិតខំ​ប្រឹងប្រែង​របស់​ប្រទេស​នានា​លើ​សកល​លោក​ក៏​ដូច​ជា​ប្រទេស​ កម្ពុជា​យើង​ ​ក្នុង​ការ​ប្រឆាំង​​អំពើ​ពុករលួយ​ ​និង​ក្នុង​គោល​បំណង​ដើម្បី​ឲ្យ​ប្រជាពលរដ្ឋ​ ​ដឹង​ថា​​អំពើ​ពុករលួយ​បាន​នឹង​កំពុង​ជះ​ឥទ្ធិពលអាក្រក់​មក​លើ​សង្គម​ជាតិ​ ​ព្រម​ទាំង​សំណូមពរ​ដល់​រាជរដ្ឋាភិបាល​ឲ្យ​អនុម័ត​ច្បាប់​ប្រឆាំង​អំពើ​ ពុករលួយ​ឲ្យ​បាន​ឆាប់​រហ័ស។​ ​​នៅ​ពេល​ព្រឹក​នោះ​មាន​ការ​ថ្លែង​របស់​វាគ្មិន​តំណាង​អង្គការ​សង្គម​ស៊ីវិល ​ ​ចំណាប់​អារម្មណ៍​របស់​តំណាង​ប្រជាពលរដ្ឋ​ ​តំណាង​យុវជន​ ​ព្រម​ទាំង​មាន​សំណួរ​ចម្លើយ​របស់​អ្នក​ចូលរួម​ ​ទាក់ទង​នឹង​អំពើ​ពុករលួយ​ ​ហើយ​ក៏​មាន​ការ​បង្ហោះ​ប៉េងប៉ោង​ ​ដោយ​ភ្ជាប់​នូវ​ពាក្យ​ស្លោក​ប្រឆាំងនឹង​អំពើ​ពុករលួយ​ទៀត​ផង។​ ​​ដោយ​ឡែក​នៅ​ពេល​រសៀល​ ​មាន​ការ​ប្រគុំ​តន្ត្រី​ចំរៀង​សម័យ​យុវវ័យ​ ​ការ​សម្តែង​រឿង​ខ្លីៗ​ ​ការ​បង្ហាញ​តាម​រយៈការ​ដើរ​បង្ហាញ​ម៉ូត​ ​ព្រម​ទាំង​សំណួរ​ចម្លើយ​ក្នុង​គោល​បំណង​អប់រំ​ពី​បញ្ហា​អំពើ​ពុករលួយ។​

ជា​កិច្ច​ចាប់​ផ្តើម​លោក​ ​ប៉ែន​ សូនី​ ​ប្រធាន​អង្គការ​ខ្មែរ​ជិវិត​ថ្មី​ ​ខេត្ត​បាត់ដំបង​ ​បាន​ថ្លែង​ពី​ប្រវត្តិ​នៃ​ទិវា​ ​អន្តរជាតិ​ប្រឆាំង​នឹង​អំពើ​ពុករលួយ​ ដោយ​លើក​ឡើង​ថា​ ​មាន​ប្រទេស​ជា​​ច្រើន​បាន​ប្រារព្ធ​ទិវា​នេះ​ជា​រៀងរាល់​ឆ្នាំ។​ ​រហូត​មកទល់​នឹង​ឆ្នាំ​២០០៨​នេះ​ មាន​ប្រទេស​ចំនួន​១២៥​បាន​ធ្វើ​សច្ចាប័ន​លើ​អនុសញ្ញា​នេះ​ហើយ។​ ​ក្នុង​នោះ​ ប្រទេស​កម្ពុជា​បាន​ចុះ​ហត្ថលេខា​ផ្តល់​សច្ចាប័ន​លើ​អនុសញ្ញា​ប្រឆាំង​អំពើ​ ពុករលួយ​នេះ​នៅ​ថ្ងៃ​ទី​០៥​ ​ខែ​វិច្ឆិកា​ ​ឆ្នាំ​២០០៧​ ​ផង​ដែរ។​

ក្រុម​អង្គការ​សង្គម​ស៊ីវិល​យល់​ឃើញ​ថា​ ​អំពើ​ពុករលួយ​មិនមាន​រចនា​សម្ព័ន្ធ​ចាត់​តាំង​ជា​អង្គភាព​ ឬ​ជា​ស្ថាប័ន​ណា​មួយ​ទេ។​ ​ដូចនេះ​អង្គការ​សង្គម​ស៊ីវិល​ក៏​មិន​បាន​បន្ទោស​ ឬ​ចោទ​ប្រកាន់​ទៅ​លើ​អង្គភាព​ ​ឬ​ស្ថាប័ន​ណា​មួយ​ថា​ ​បាន​ប្រព្រឹត្ត​ ​អំពើ​ពុករលួយ​នោះ​ដែរ​ ​តែ​យើង​សូម​ស្នើ​ ​និងលើក​ទឹក​ចិត្ត​ឲ្យ​មាន​ការ​ចូលរួម​ពីគ្រប់​ភាគី​ពាក់ព័ន្ធ​ ​និង​ប្រជាពលរដ្ឋ​ទូទៅ​ ​ដើម្បី​ធ្វើ​ការ​ប្រឆាំង​ទៅ​លើ​បុគ្គល​ ​ឬ​ក្រុម​ដែលប្រព្រឹត្ត​អំពើ​ពុករលួយ។​ ​លោក​ប្រធាន​អង្គការ​ខ្មែរ​ជីវិត​ថ្មី​ បាន​បន្ត​ទៀត​ថា​ ​បច្ចុប្បន្ន​នេះ​រាជរដ្ឋាភិបាល​កម្ពុជា​បាន​ប្រកាស​រួច​មក​ហើយ​ពី​ការ​ធ្វើ ​សង្គ្រាម​ជាមួយ​នឹង​អំពើ​ពុករលួយ​ ​ដោយ​ថ្មីៗ​នេះ​ការ​ខិតខំ​ប្រឹងប្រែង​របស់​រាជរដ្ឋាភិបាល​ប្រឆាំង​នឹង​អំពើ​ ពុករលួយ​ ក្នុង​នោះមាន​យុទ្ធសាស្ត្រ​ចតុកោណ​ដោយ​យក​អភិបាលកិច្ច​ល្អ​ជា​ស្នូល​ ​ការ​ធ្វើ​គោលនយោបាយ​វិមជ្ឈការ​ក៏​ដូចជា​ការ​បង្កើត​ឲ្យ​មាន​អង្គភាព​ ប្រឆាំង​អំពើ​ពុករលួយ​ ​ដែល​ស្ថិត​នៅ​ក្រោម​ទីស្តី​ការ​គណៈរដ្ឋមន្ត្រី​ជា​ដើម។​ ​ជាក់​ស្តែងនាពេល​ថ្មីៗ​កន្លង​មក​នេះ ក្នុង​ឱកាស​ដែល​ប្រមុខ​រដ្ឋាភិបាល​កម្ពុជា​បាន​ជួប​ជា​មួយ​ម្ចាស់​ជំនួយ​កាល ​ពី​ថ្ងៃ​ទី​០៤-​០៥​ ​ខែ​ធ្នូ​ឆ្នាំ​២០០៨​ ​រាជរដ្ឋាភិបាល​បាន​សន្យា​ថា​ ​ចាំបាច់​ត្រូវ​ធ្វើ​កំណែ​ទម្រង់​ ​គឺ​៩៩​ភាគរយ​រស់​ ​និង​បើ​មិន​កែ​ទម្រង់​នោះ​៩៩​ភាគរយ​ត្រូវ​ស្លាប់។​

ត្រង់​ចំណុច​ខាង​លើ​នេះ​ដែរ​ ​ក្នុង​នាម​អង្គការ​សង្គម​ស៊ីវិល​ ​យើង​សូម​ធ្វើ​ការ​គាំទ្រ​ទាំង​ស្រុង​ចំពោះ​ប្រសាសន៍​ដ៏មាន​អត្ថន័យ​ ​និងការ​សន្យា​របស់​ប្រមុខ​រាជរដ្ឋាភិបាល​លើ​ការ​កែទម្រង់​ និងការ​អនុម័ត​ច្បាប់​ប្រឆាំង​អំពើ​ពុករលួយ​ដែល​ស្រប​តាម​ស្តង់ដារ​អន្តរជាតិ។​

ដោយ​ឡែក​សង្គម​ស៊ីវិល​ ​និង​ប្រជាពលរដ្ឋ​ទូទៅ​ ​ត្រូវ​ចូលរួម​ជា​មួយ​រាជរដ្ឋាភិបាល​ក្នុង​ក្របខ័ណ្ឌ​រួម​ទប់ស្កាត់​ និង​កាត់​បន្ថយ​អំពើ​ពុករលួយ​ដោយ​ប្រកាន់​ខ្ជាប់​នូវ​វប្បធម៌​មិន​សូកប៉ាន់​ ​និង​មិន​បង់​លុយ​ឲ្យ​បុគ្គល​ ​ឬ​សមត្ថកិច្ច​ ​ដោយ​គ្មាន​ហេតុ​ផល​ស្រប​ច្បាប់​ណា​មួយ​ ​ហើយ​ប្រជាពលរដ្ឋ​ទូទៅ​ត្រូវ​តែ​ហ៊ាន​និយាយ​ដោយ​ចំហ​ចំពោះ​អំពើ​ពុករលួយ​នេះ ​ផង​ដែរ។​

លោក​ស្រី​ ​ឯម​ ​សុផល​ ​តំណាង​ប្រជាពលរដ្ឋ​ខេត្ត​បាត់ដំបង​មាន​ចំណាប់​អារម្មណ៍​ថា​ ​បញ្ហា​អំពើ​ពុករលួយ​មិនមែន​ជា​រឿង​ថ្មី​ទេ​នៅ​កម្ពុជា​ ​ព្រោះ​ប្រជាពលរដ្ឋ​ទូទៅ​បាន​ជួប​ប្រទះ​ ​និង​ឆ្លង់​កាត់​ពី​ផលវិបាក​នៃ​អំពើ​ពុករលួយ​នេះ។​ ​អំពើ​ពុករលួយ​នៅ​កម្ពុជា​ ​គឺ​មាន​ស្ទើរ​តែ​គ្រប់​កន្លែង​ ​និង​អាច​ចាត់​ទុក​ថា​ ​កន្លែង​ណា​មាន​អំពើ​ពុករលួយ​ ​គឺ​មាន​អំពើ​អយុត្តិធម៌​ ​និង​ភាព​ក្រីក្រ។​ ​យើង​សង្កេត​ឃើញ​ថា​ ​បុគ្គល​បំរើការងារ​តាម​ស្ថាប័ន​រដ្ឋ​មួយ​ចំនួន​បាន​ប្រើប្រាស់​តួនាទី​របស់​ខ្លួន​ប្រព្រឹត្ត​អំពើ​ពុករលួយ​ ​ដូចជា​ការ​ទារ​ប្រាក់​ចុះ​បញ្ជី​ ​ការ​​ផាក​ពិន័យ​ ​និង​សេវា​កម្ម​ផ្សេងៗ​ទៀត​ ​លើស​ពី​ការ​កំណត់។​ ​លោក​ស្រី​ក៏​បាន​សម្តែង​នូវ​ក្តី​ព្រួយ​បារម្ភ​ផង​ដែរ​ថា​ ​ ​កត្តា​ទាង​អស់​នេះ​ហើយ​ដែល​ធ្វើ​ឲ្យ​ប្រជាពលរដ្ឋ​អស់​ជំនឿ​ន ​ហើយ​ចាត់​ទុក​ថា​ ​អំពើ​ពុករលួយ​ ​គឺ​ជា​បញ្ហា​ចាក់​ឬស​ ​ចាក់​គល់​ ​ដែល​មិន​ងាយ​ នឹង​កាត់​ផ្តាច់​បាន។​ ​ដូច្នេះ​ក្នុង​នាម​ប្រជាពលរដ្ឋ​ ​ពួក​គាត់​សូម​សំណូមពរ​ឲ្យ​រាជរដ្ឋាភិបាល​ ​ធ្វើ​យ៉ាង​ណា​ឲ្យ​ច្បាប់​ប្រឆាំង​នឹង​អំពើ​ពុករលួយ​ ​ត្រូវ​បាន​អនុម័ត​ឲ្យ​បាន​ឆាប់​ដើម្បី​យក​មក​បំរើ​ផល​ប្រយោជន៍​ដល់​សង្គម​ជាតិ។​

កញ្ញា​ ​គឹម​ ​សុភ័ក្រ​ ​តំណាង​យុវជន​ខេត្ត​បាត់​ដំបង​ ​បាន​លើក​ឡើង​ពី​ក្តី​សង្ឃឹម​របស់​យុវជន​មក​លើ​រាជរដ្ឋាភិបាល​ដែល​បាន​សន្យា ​ថា​ ​នឹង​ប្រយុទ្ធ​ប្រឆាំង​នឹង​អំពើ​ពុករលួយ​ព្រោះ​យើង​ចង់​ឲ្យ​សម្តី​នេះ​ក្លាយ ​ជា​ការពិត​ ​ស្រាប​តាម​ឆន្ទៈពិត​ដែល​យើង​ទាំង​អស់​គ្នា​ចង់​បាន​ ​និង​ស្រប​ពេល​នោះ​ដែរ​យើង​យល់​ថា​ ​យុវជន​ត្រូវ​តែ​ចូលរួម​យ៉ាង​សកម្ម​ជាមួយ​រដ្ឋាភិបាល​ ​និង​អង្គការ​សង្គម​ស៊ីវិល​ក្នុង​ក្រប​ខណ្ឌ​ដើម្បី​ប្រយុទ្ធ​ប្រឆាំង​នឹង​ អំពើ​ពុករលួយ​ផង​ដែរ។​ ​ក្នុង​នាម​យុវជន​ខេត្ត​បាត់ដំបង​ក៏​ដូច​ជា​យុវជន​នៅ​ទូទាំង​ប្រទេស​ ​សូម​ឲ្យ​រាជរដ្ឋាភិបាល​បន្ត​នូវ​ការ​ប្រយុទ្ធ​ប្រឆាំង​អំពើ​ពុករលួយ​ ​ដើម្បី​បាន​ជា​ប្រយោជន៍​ដល់​សង្គម​ ​និង​យុវជន។​

សូម​ឲ្យ​ច្បាប់​ប្រឆាំង​អំពើ​ពុករលួយ​បាន​អនុម័ត​ឆាប់​បាន​អនុម័ត​ឆាប់​ ​សំដៅ​កាត់​បន្ថយ​ឲ្យ​បាន​នូវ​អំពើ​ពុករលួយ​យ៉ាង​ពិត​ប្រាកដ​នៅ​កម្ពុជា។​

ថ្លែង​ក្នុង​ចំណាប់​អារម្មណ៍​របស់​តំណាង​អង្គការ​ សង្គម​ស៊ីវិល​លោក​ ​អ៊ឹម​ ​សុភា​ ​ជា​នាយក​រង​នៃ​មជ្ឈមណ្ឌល​អភិវឌ្ឍន៍​សង្គម​បាន​ធ្វើ​ការ​ទាញ​អារម្មណ៍​អ្នក​ ចូលរួម​យល់​ពី​ស្ថានភាព​ទូទៅ​ទាក់ទង​នឹង​អំពើ​ពុករលួយ​ថា​ ​ដោយសារ​តែ​ច្បាប់​ប្រឆាំង​អំពើ​ពុករលួយ​នៅ​មិន​ទាន់​បាន​អនុម័ត​នៅ​ឡើយ​ ​និង​ទោះជា​យើង​បាន​ដឹង​ថា​ ​មាន​អំពើ​ពុករលួយ​កើត​ឡើង​ ​ដូចជា​តាម​រយៈបណ្តឹង​ ​ការ​ផ្តល់​ព័ត៌មាន​ ​និង​ការ​ស៊ើប​អង្កេត​ ​មាន​គោលដៅ​ច្បាស់លាស់​ពិត​ប្រាកដ​ក៏​ដោយ​ ​ក៏​ពេល​នោះ​គេ​មិន​អាច​ដាក់​បន្ទុក​ ​ឬ​ចោទ​ប្រកាន់​ជន​ល្មើស​នោះ​បាន​ឡើយ។​ ​ដោយ​ហេតុ​នេះ​ហើយ​ទើប​អង្គការ​សង្គម​ស៊ីវិល​ ​ប្រជាពលរដ្ឋ​រដ្ឋាភិបាល​ ​និង​អ្នក​ពាក់ព័ន្ធ​ទាំង​ឡាយ​ចង់​ឲ្យ​ច្បាប់​ប្រឆាំង​អំពើ​ពុករលួយ​ ​ឆាប់​បាន​អនុម័ត​ដើម្បី​យក​មក​អនុវត្ត។​ ​តែ​បើ​យើង​មាន​ច្បាប់​ប្រើ​ហើយ​នោះ​ ​គឺ​ជា​ឱកាស​មួយ​ធ្វើ​ឲ្យ​អ្នក​ដែល​ប្រព្រឹត្ត​អំពើ​មិន​គប្បី​នោះ​ ​មិន​អាច​ប្រព្រឹត្ត​តទៅ​ទៀត​បាន​ទេ​ ​ដោយសារ​យើង​មាន​ច្បាប់​ជា​សម្អាង​សម្រាប់​ធ្វើ​ការ​វិនិច្ឆ័យ​ទោស​ទណ្ឌ​ទៅ​ លើ​អ្នក​ដែល​ប្រព្រឹត្ត​នោះ។​ ​ឯផល​ប៉ះពាល់​ដែល​យើង​ចេះ​តែ​បារម្ភ​នោះ​ ប្រសិន​បើ​ច្បាប់​ប្រឆាំង​អំពើ​ពុករលួយ​នៅ​តែ​អូស​បន្លាយ​តទៅ​ទៀត​ គឺ​វា​អាច​នាំឲ្យ​បាត់​បង់​ចំណូល​ថវិកា​ជាតិ​ពី​ប្រភព​ផ្សេងៗ​ដោយ​ចៀស​មិន​ ផុត។​ ​សម្រាប់​ចំណុច​នេះ​យើង​មិ​ន​ចោទ​រដ្ឋាភិបាល​ថា​ ជា​អ្នក​ធ្វើ​ខុស​ទេ​ ​គឺ​បុគ្គល​ខិល​ខូច​មួយ​ចំនួន​នោះ​ទេ​ ​ដែល​ជា​អ្នក​ឆ្លៀត​ឱកាស​ប្រព្រឹត្ត​អំពើ​ពុករលួយ​ដោយ​មិន​បាន​គិ​ត​ ពិការអភិវឌ្ឍន៍​ប្រទេស​ជាតិ​ឡើយ។​ ​ដូច្នេះ​ការ​ដែល​យើង​មាន​ច្បាប់​អនុវត្ត​ប្រកប​ដោយ​ប្រសិទ្ធភាព​ពិត​ប្រាកដ ​មែន​នោះ​ គឺ​ជា​ការរួម​ចំណែក​ជួយ​យើង​មួយ​ផ្នែក​ក្នុង​ការពង្រឹង​ស្ថានភាព​សេដ្ឋកិច្ច ​ឲ្យ​មាន​ការ​រីក​ចម្រើន​លូតលាស់​បន្ថែម​ទៀត​ផង​ដែរ។​

ចំណុច​មួយទៀត​ដែល​អង្គការ​សង្គម​ស៊ីវិល​ ​និង​មជ្ឈដ្ឋាន​មួយ​ចំនួន​មាន​ការ​ព្រួយ​បារម្ភ​នោះ​ ​គឺ​បញ្ហា​ទាក់ទង​នឹង​ច្បាប់​ ដែល​កន្លង​មក​រាជរដ្ឋាភិបាល​តែងតែ​មាន​ប្រសាសន៍​ថា​ ​ចង់​ឲ្យ​ច្បាប់​នេះ​ស្រប​តាម​និយាម​អន្តរជាតិ​ ​ដូចបណ្តា​ប្រទេស​នានា​ ​ដែល​បាន​អនុវត្ត​រួច​មក​ហើយ។​ ​តែ​មួយ​ទៀត​សោត​ គឺ​យើង​ចង់​ឃើញ​ការ​បង្កើត​គណៈកម្មការ​មួយ​ឯករាជ្យ​ដែល​មិន​ចំណុះ​ឲ្យ​គណបក្ស​នយោបាយ​ណា​មួយ​​ឡើយ​ ​ឬ​ក៏​គណៈ

កម្មការ​នោះ​ពុំ​ទទួល​នូវ​ការ​គាប​សង្កត់​ខាង​ផ្នែក​ នយោបាយ​ ​ហើយ​គណៈកម្មការ​នោះ​ត្រូវមាន​ថវិកា​ខ្លួន​ឯង​ផ្ទាល់​ ​ដើម្បី​រៀបចំ​ស្ថាប័ន​នេះ​ដោយ​មិន​ពឹង​ផ្អែក​សា្ថប័ន​រដ្ឋ។​ ​ដោយ​ឡែក​ក្នុង​នាម​អង្គការ​ ​សង្គម​ស៊ីវិល​សូម​អំពាវនាវ​ឲ្យ​មាន​ការ​ដាក់​បញ្ចូល​ក្នុង​ច្បាប់​ស្តីពី​ ការ​ប្រកាស​ទ្រព្យសម្បត្តិ​របស់​បុគ្គល​សាធារណៈ​ក្នុង​ជួរ​រដ្ឋាភិបាល​នៅ​ ពេល​ដែល​ច្បាប់​ប្រឆាំង​អំពើ​ពុករលួយ​ត្រូវ​បាន​អនុម័ត។​

ជា​ទូទៅ​យើង​សន្និដ្ឋាន​ថា​ ​កិច្ចការ​មិន​អាច​ធ្វើ​បាន​ត្រឹមតែ​ស្ថាប័ន​ឯករាជ្យ​មួយ​ប៉ុណ្ណោះ​ទេ​ គឺ​ដាច់​ខាត​ត្រូវ​មាន​ការ​រួម​សហការ​ពីសំណាក់​អាជ្ញាធរ​ពាក់ព័ន្ធ​ ​ប្រជាពលរដ្ឋ​ ​តំណាង​សង្គម​ស៊ីវិល​ ​និងអាច​រហូត​ដល់​ថ្នាក់​អន្តរជាតិ​ផង​ដែរ​ ដើម្បី​ធ្វើ​ការ​រួម​គ្នា​ព្រោះ​យើង​មិន​អាច​ធ្វើ​ការងារ​នេះ​តែ​ម្នាក់​ឯង​ បាន​ឡើយ។​

ក្នុង​ឱកាស​នោះ​អ្នក​ចូលរួម​បាន​លើក​ជា​សំនួរមួយចំនួន​ ស្តី​ពី​សំនួរ​ទាក់​ទងនឹង​អំពើ​ពុករលួយ​ និង​ការស៊ី​សំណូក​ផ្សេងៗ​ដូចជា​ការ​ផាក​ពិន័យ​របស់​ប៉ូលិស​ចរាចរ​ជា​ដើម។​

ឆ្លើយ​នឹងសំណួរ​របស់​អ្នក​ចូលរូម​ ​វាគ្មិន​បាន​លើក​ឡើង​ថា​ ​បណ្តឹង​គឺ​មាន​ការទាក់ទង​នឹង​ច្បាប់​ក្នុង​ករណី​មាន​អំពើ​ពុករលួយ​កើត​ឡើង​ ហើយ​​តើ​ត្រូវ​ប្តឹង​អ្នក​ណា?​ ​យើង​បាន​ដឹង​ហើយ​ថា​ ​មិន​ទាន់​មាន​ច្បាប់​ប្រឆាំង​អំពើ​ពុករលួយ​ទេ​ ​ប៉ុន្តែ​យើង​អាច​ប្តឹង​បាន​ព្រោះ​យើង​មាន​ច្បាប់​រដ្ឋប្បវេណី​និង​ច្បាប់​ ក្រម​ព្រហ្មទណ្ឌ​អ៊ុនតាក់​ ​និង​ប្រសិន​បើ​យើង​ឃើញ​ថា​ ​ការ​ប្រព្រឹត្ត​នោះ​មាន​ចរិក​គាប​សង្កត់​យក​លុយ​ ​ឬ​តាម​មធ្យោបាយ​ណា​មួយ​ពិ​បុគ្គលិក​ផ្តល់​សេវា​កម្ម​សាធារណៈ​ ​ដូចជា​គ្រូ​បង្រៀន​ ​បុគ្គលិក​ពេទុ្យ​ ​ប៉ូលិស​ចរាចរណ៍​ ​ឬ​មន្ត្រី​ផ្តល់​សេវាកម្ម​តាម​ស្ថាប័ន​ដទៃ​ទៀត​ពិត​មែន​នោះ​ ​យើង​អាច​ដាក់​ពាក្យ​បណ្តឹង​ ​ទៅ​ប្រធាន​អង្គភាព​របស់​ពួក​គាត់​ហើយ​នៅ​ពេល​ណា​ច្បាប់​ប្រឆាំង​អំពើ​ ពុករលួយ​បាន​អនុម័ត​ ​នោះ​យើង​នឹង​មាន​យន្តការ​បន្ថែម​ទៀត​ទៅ​ដល់​ភ្នាក់ងារ​មាន​សមត្ថកិច្ច​ដែល​ ទទួល​ពាក្យ​បណ្តឹង​នោះ​ ​ប៉ុន្តែ​យើង​ក៏​មិន​នៅ​ទាន់​ដឹង​ច្បាស់​ពី​ការ​កំណត់​និយមន័យ​នៃ​ច្បាប់​ នោះ​នៅ​ឡើយ​ដែរ។​

ចំពោះ​ការ​ប្តឹង​ហើយ​ ​តើ​បាន​ផល​អ្វី​ខ្លះ​នោះ​ ​យើង​បាន​ដឹង​ច្បាស់​ហើយ​ថា​ ​ច្បាប់​ប្រឆាំង​អំពើ​ពុករលួយ​មិន​ទាន់​ចេញ​ជា​រូបរាង​ទេ​ ​ហើយ​យើង​ចង់​បាន​ច្បាប់​នោះ​មក​ការពារ​អ្នក​ប្តឹង​ផង​ ​ព្រោះ​គេ​អាច​គុំគួន​សងសឹក​ ​ឬ​អាច​ធ្វើ​អ្វី​មួយ​ចំពោះ​គាត់​ទៅ​ថ្ងៃ​ក្រោយ​ ​អញ្ចឹង​ហើយ​បាន​ជា​យើង​ទាមទារ​ឲ្យ​មាន​ច្បាប់​មួយ​អាច​ការពារ​សាក្សី​ ​និង​ឲ្យ​មាន​សុវត្ថិភាព​ដល់​អ្នក​ប្តឹង។​ ​ដោយឡែក​ការ​ផាក​ពិន័យ​របស់​ប៉ូលិស​ចរាចរ​នៅ​តាម​ដង​ផ្លូវ​សាធារណៈ​ប្រសិន​ បើ​ការ​ផាក​ពិន័យ​នោះ​ស្រប​តាម​ការ​កំណត់​ ​និង​មាន​វិក្កយបត្រ​ត្រឹមត្រូវ​ ​គឺ​មិន​ត្រូវ​បាន​ចាត់​ទុក​ថា​ ជា​អំពើ​ពុករលួយ​ទេ​ ​តែ​បើ​ការ​ផាក​ពិន័យ​លើស​ការ​កំណត់​ ​និង​គ្មាន​វិក្កយបត្រ​នោះ​ ​គឺ​ចាត់​ថា​ ​ជា​អំពើ​ពុករលួយ​ហើយ។​

នា​ពេល​រសៀល​ថ្ងៃ​នោះ​ដដែល​ ​មាន​ការ​ប្រគុំ​តន្ត្រី​ ​ឈុត​សម្តែង​រឿង​កំប្លែង​ខ្លីៗ​ ​ការ​ដើ​បង្ហាញ​សារ​ប្រឆាំង​អំពើ​ពុករលួយ​ សំណួរ​ ​ចម្លើយ​ ​ល្បង​ប្រាជ្ញា​ ​ដែល​សុទ្ធសឹង​រៀបចំ​ឡើង​ដើម្បី​បង្កើន​ការ​យល់​ដឹង​ ​ការ​អប់រំ​ពី​បញ្ហា​ពុករលួយ​ទាំង​អស់​ ​និង​ថែម​ ​ទាំង​មាន​ការ​ផ្តល់​ជា​រង្វាន់​លើក​ទឹក​ចិត្ត​ដល់​អ្នក​ទស្សនា​ដែល​មាន​ សេចក្តី​ក្លាហាន​ឡើង​ឆ្លើយ​សំណួរ​បាន​ត្រឹមត្រូវ​ទៀត​ផង។​​

ដក​ស្រង់​ចេញ​ពីៈ​
-ព្រឹត្តបត្រ​មជ្ឈមណ្ឌល​អភិវឌ្ឍន៍​សង្គម​ ​ឆ្នាំ​ទី​១៥​ ​លេខ​១៤៦​ ​ខែ​វិច្ឆិកា-​ធ្នូ​ ​ឆ្នាំ​២០០៨។​

 
< Prev   Next >

ព័ត៌មានថ្ងៃនេះ

Download Khmer Unicode

អ្នកអានថ្ងៃនេះ​ : 0
សរុប​អ្នកអាន : 0
អានទំព័រ : 3573848
ទិន្នន័យចាប់ពីថ្ងៃ​ : 2013-04-30
Totals Top 5
0 អ្នកទស្សនាមកពី​ : 273 ប្រទេស